1.10.10

تصنيع و انتاج الفونيك

بسم الله الرحمن الرحيم


توكلنا على الله سبحانه وتعالى



أولا : معذرة لإننى سأكتب الموضوع متفرق لإنه سيستغرق وقت طويل هذا أولا ثم ثانيا لإنشغالى بأمور أخرى ولكن أعدكم أننى سوف أجمع كل ما سأكتبه مرة ثانية فى موضوع مستقل حتى يتيسر على القارىء ويسهل

وثانيا : أنا سأترك الكلام بالعربية وسأتكلم بلغة بلدنا مصر لغة الناس العامية لإن الكلام كتير هذا أولا ولإن هذا أسهل لعرض كل المعلومات المخزونة فى الذهن

.................................................. .................................................. ..............................



فى كتير من الشباب بيفكر فى مشروع مربح ويبقى بداية له ومدخل فى عالم المنظفات يعنى يبقى فتح لباب رزف تانى وكبير لمنظفات كتيرة أقوله مشروع الفنيك هو بوابة كل المنظفات اللى هيفتحلك طريق عند العميل هو الفنيك يعنى طريق انك بعد كده تعبى منظفات أخرى أو تتاجر فى المنظفات زى الكلور والسلفونيك وماية النار والصودا وبودرة السلخ و............... إلى أخره

طيب واحد هيقولى اشمعنة الفنيك بالذات طيب مش ممكن يكون الكلور أو السلفونيك أو .........أو أو ........... مش ممكن يكون أى حاجة تانية تبقى هى بوابة ومدخل لمنظفات تانية كتير أقولك على سبيل التجربة بس من غير ما أصرح باسم شركات علشان محدش يزعل منى انا كنت بعمل مع ناس أصحابى هما 5 شركاء كان واحد فيهم قبل اما يتجمعوا مع بعض ويعملوا شركة كان واحد فيهم بيتاجر فى الخل اول ما الشركاء اتجمعموا وعملوا شركة باع الواحد اللى كان فيهم اللى كان بيتاجر فى الخل وبيعبى خل نصيبه فى الخل لقريبه وشارك الأربعة صحابه وقرروا انهم يتاجروا فى الخامات بس قابلتهم مشكلة ان فيه ناس كتير بتاجر فى الخامات وان الخامات دية كده كده بتجاب من مصادرها ففكروا طيب احنا لما نتاجر فى الخامات طيب ايه اللى هيميزنا عن الشركات التانية ويخلى لينا اسم وسطيهم خاصة انهم لسه كانوا جداد فى الكار والشركات اللى حوليهم ليها اسمها من زمان فقرروا انهم يبدأوا بالفنيك تصنيع وتعبئة ويبقى ليهم منتج اسمه فنيك كذا يميز الشركة وسط الشركات فى السوق ويسهل لهم بيع الخامات التانية من المنظفات اللى كل الناس دلوقتى بتاجر فيها بس مش أى حد برده بيكبر فيها هما برده عرفوا ينقوا مصدر للسلفونيك الصح والكلور الصح وال.......... و ال............كل الخامات الصح اللى مبتتغشش وفى نفس الوقت سعرها مقارب أغلى بسيط جدا من اللى بتتغش بس يكفى انها تركت أثر عند العميل بمصداقية هذه الشركة وفعلا بقوا من الشركات المعروفة فى السوق وليها رواج فى كل المحافظات وشعار الشركة بتاعتهم اسم الفنيك يعنى العملاء يمكن مايعرفوهم إلا باسم الفنيك بتاعهم من كتر شهرته الأن شهرة الفنيك بتاعهم يعنى خاصة المعبأ منه ودول صراحة الناس اللى اتعلمت منهم وهما قدوة للى عايز يكبر لإنهم يا إخوانى اول مابدأوا بدأوا صغيرين وبعربية واحدة ورأس مال صغير يمكن لا يتعدى ال 30000 جنيه لكن وبعد 5 سنين من بدايتهم فى السوق بقوا من الشركات الكبيرة والمعروفة ومبقاش فنيك بس بقوا يوفروا لك كل ما يحتاجه محل المنظفات من الإبرة للصاروخ زى ما بيقولوا ودول أصحابى ومثلى الأعلى وليهم فضل بعد ربنا سبحانه وتعالى عليه لإنى اتعلمت منهم كتير قوى من ضمن الحاجات اللى اتعلمتها منهم واهم شىء هى ( الفكرة اللى فى دماغك واللى ممكن تكون حلم لو صممت وعزمت الأمر وتوكلت على الله هتبقى حقيقة ) وفعلا هما قدوة لأى شركة عايزة تنجح وتكبر فى وقت قصير وتحقق حلمها فى وقت قصير

المهم مش هما دول بس برده انا اعرف ناس بس مش شغالين غير فى الفنيك بس تعبئة و بيعه سايب بالطن والعملية بدأت معاهم بطن وبقت دلوقتى بال3 وال4 طن بيع شهريا وممكن لعميل واحد خلاف طبعا القطاعى والمعبأ يعنى ممكن يبيعوا 10 طن شهريا محدش يستغرب لأ لما تنزل وتجرب بنفسك هتلاقى اللى يطلب منك بال2 طن وال 3 طن خاصة من تجار المنظفات الكبار والأن هما مش ملاحقين على السوق من كتر الطلبات عليهم يعنى ال10 طن بيع شهريا بقى بالنسبة ليهم رقم عادى ودلوقتى دخلوا برده فى بيع الخامات الأخرى من المنظفات زى السلفونيك والكلور وغيره وغيره بس برده مستواهم مش زى الشركة الأولى اللى قلت لكم عليها لإنهم 5 شركاء بينزلوا السوق بنفسيهم ومعاهم برده كذا مندوب بس هما اساتذة المناديب لإنهم مازالوا بينزلوا بنفسيهم حتى بعد ما كبروا والنقطة التانية إنهم مبيبخلوش على المشروع من التمويل وده أهم شىء مع التسويق يعنى مرة انا سمعت رقم من واحد فيهم والكلام ده من سنة تقريبا ان راس مالهم وصل ل300000 جنيه خامات فنيك وغيره وطبعا العربيات مش محسوبة لإنه كل الشركات بتجيب جديد وقسط فبقت العربيات مش مشكلة والشركة التانية اللى بقول لكم عليها برده بدل ما كان عندهم عربية بقى 3 عربيات كله بيقلد كله المهم النجاح والمنافسة الشريفة وربنا يرزق الكل بمنه وفضله وكرمه المهم خد القاعدة : الفكرة اللى فى دماغك حولها لحقيقة فى الواقع وحولها لحقيقة وسط الناس بتسويقها صدقنى بإذن الله هتكبر وهتنافس كمان منافسة شريفة طبعا

واللى مجرب الفنيك بنفسه وشغال فيه هيعرف انا ليه قلت ان الفنيك بوابة ومدخل لجميع المنظفات

طبعا فيه ناس عايزة تقولى ايه يا عم الحاج هو فيه ايه انتا عمال تتكلم وخلاص ولا فيه دراسة جدوى ولا حاجة وكلامك كله متناقض مرة تقول فى موضوعك اللى كتبته من فترة ممكن تبدأ ب 15000 جنيه ومرة تقول 30000جنيه ومرة نلاقيك بتتكلم عن عربيات وخامات تانية و100000 جنيه و300000 جنيه وطالع وكلامك كله متناقض ولا فيه دراسة جدوى ولا حاجة

أقول لكم أبشر تعال ندردش شوية فى الهمم العالية قبل اما نتكلم عن مشروعنا

ببساطة كده وبدون مقدمات انتا عايز ايه تقعد تمصمم فى شفايفك وواقف محلك سر وعمال تبص للى حواليك وكأنهم عملوا معجزة وتبص للى حواليك وانتا مستغرب وتقول مش ده اللى كان على قده ده بص شوف بقى ايه مش ده اللى كان فاتح محل منظفات بس دلوقتى مصنع وتوزيع وعربيات هو فيه ايه وتتعجب وكأنه عمل معجزة وتقول وتعيد وتزيد وملكشى شغله غير الكلام على الناس والحسد والعيب فيك انتا انك مش متوكل على الخالق الرزاق سبحانه وتعالى ومش عملى ولا عالى الهمة يبقى ليك حق تستغرب

أما اصحابنا اللى نفسهم يبقوا حاجة ونفسوا يكبر ويكبر أهله وعياله معاه وأقاربه ويشغل أصحابه ومعارفه ويفوق بقى من النوم العميق ومص الشفايف وكأنه من كوكب تانى والناس اللى نجحوا وعملوا مشاريع مخلوقات فضائية معاها معجزات

ايه يا عم فوق الله يخليك يا بخت من بكانى وبكى عليه ولا ضحكنى وضحك الناس عليه انتا مش عايز تنفع بلدك وأهلك وناسك وتأمن مستقبل أولادك بعد ارادة الله سبحانه وتعالى طبعا وتوفيقه

لازم يبقى عندك هدف تعيش علشانه انك تنفع نفسك واهلك واولادك واصحابك وتكبر وتكبر الناس معاك وتدى فرصة لغيرك يقلدك ويكبر زيك علشان نساعد بعضنا ونكبر بعضنا

يبقى قوم اغسل وشك من علق دنو الهمة على الوجه وتوكل على الله سواء كان مشروعى او مشروع غيرى فى مجالنا او فى اى مجال تانى معاك 10000 او 5000 حتى جيب على قدك واجرى فى السوق وعافر ونافس هتقع مرة واتنين بس صدقنى هتكبر التالتة هتخربش فى السوق والسوق يخربش فيك شوية بس هتتعلم وتحقق هدفك اللى انتا لازم تعيش من اجله ايه كلامى كان متناقض معاك ولقيت فيها عربيات و العملية وسعت وبقى فيها راس مال ضخم ايه يعنى ابدأ انتا على قدك بمالك اللى معاك وعافر شوية فى السوق وزود تسويقك شوية هيطير النوم من عينك وهيزيد تفكير وهتنفد جهودك بس هتلاقى نتيجة ذلك بعد كده وهتنسى كل التعب اللى تعبته فى حياتك لما هتفرح بنجاحك انزل بقى السوق وابدأ وصاحب الناس وكبر فكرتك ومشروعك حتى لو هتبدأ على أدك و تأجر عربية فى البداية او تشوف حد زيك كويس وهمته عالية وتشاركه وتكبر وتكبره معاك وتوكلوا على الله وسوقوا مشروعكم بنفسكم فى الأول واجروا وعافروا فى السوق واشتغلوا وادوا مشروعكم وحلمكم كل ما تملكوا من مال ومجهود فى سبيل تحقيق الهدف صدقنى إن شاء الله بمنه وفضله وكرمه سبحانه وتعالى القادر على كل شىء وبالدعاء لله هتكبر وتكبر غيرك معاك وياما ناس وانتا خبير بكده كانت ملهاش اصلا زى ما بيقولوا فى الطور ولا فى الطحين وملهاش اصلا فى الشغل مدلعين وبقوا من اصحاب الشركات وياما ناس مكنشى ينفع يبقى مندوب وكل اما يروح لشركة ترفضه وبتوفيق الله وبالعزيمة والإرادة بقى من احسن المندوبين فى السوق ومعروف وله اسمه فى السوق المهم فكرتك اللى فى خيالك وحلمك تحققها وتخليها واقع بين الناس علشان تنجح اما انك تقعد تقول المجال ده مش مجالى يا عم ده انا اشتغل عند الناس احسن واحط الإرشين اللى معاية فى البنك واعيش وربى عيالى يا عم محدش عارف بكرة فيه ايه

اقولك يا عم سيبك من الكلام الفاضى ده اللى لا يودى ولا يجيب وبعدين هو انتا اللى بترزق نفسك ايه انتا هتخرف ولا ايه ده ربنا هو الرزاق ورزقك كده كده مكتوبلك زى موتك تمام انتا ما عليك إلا إنك تسعى وربنا إن شاء الله مش هيضيع جهدك طالما نيتك كويسة ومالك حلال وبتحب أهلك وعيالك والناس وبتحب الخير لكل الناس توكل على الله وادخل فى مشروعى او مشروع غيرى فى مجالنا او فى اى مجال وحط الهدف وادعى ربك وتوكل عليه وابدأ وهتلاقى خير إن شاء الله ماكنت ابدا تحلم بيه عارف ليه لإنك متوكل على الخالق سبحانه وتعالى



نبدأ فى مشروعنا على بركة الله

طبعا أى مشروع فى الدنيا بيحتاج لمكان وأى مكان بيبقى ليه مواصفات تختلف من نشاط لأخر

ومشروعنا طبعا عايز مكان يتم فيه التصنيع والمكان عايز مواصفات بس فيه سؤال ممكن يدور فى ذهن كل واحد مننا وهو هل مشروع مثل الفنيك بيتعمل داخل المدن والقرى ولا لازم يكون خارج المدن فى المناطق الصناعية أقولك طبعا ده حسب البلد اللى انتا فيها والمحافظة التابع لها ونظام المجلس المحلى او مجلس المدينة اللى انتا فيها ومتطلباته فكل مكان بيختلف عن الأخر فى نظام مجلسه المحلى اللى فيه وقوانينه يعنى مثلا عندنا فى الأرياف وفى كذا محافظة قريبة من بعض

شركات كتيرة كبيرة ومعروف منتجها فى السوق منتج الفنيك يعنى ومصنعها جراج تحت عمارة وداخل القرية وفى شارع ضيق ووسط سوق أكثر من 5 شركات على هذا النظام ومرخصين طبعا زى صور جايبهالكم لمصنع من الشركات دية سوف ارفع لكم صوره هتلقوه تحت عمارة وعبارة عن جراج

فنرجع ونقول ده قلنا حسب نظام مجلس الحى او المدينة اللى انتا فيها وقوانينه فكل بلد وليها نظامها وأيضا كل مجلس وليه نظامه لإنه قد يكون داخل المدينة الواحدة او القرية الواحدة مجلسين او اكثر مثل حى اول حى تانى حى تالت فكل حى داخل المدينة الواحدة او داخل القرية الواحدة وله نظامه وهكذا فكل مجلس وليه نظامه وكل موظف وليه نظامه ممكن يكون موظف معقد وموظف طيب ومتساهل المهم كده كده إن شاء الله فيه رخص لمشروع الفنيك علشان تتطمن المهم اسعى انتا فى الرخصة علشان بتاخد وقت شوية من 4 إلى 6 شهور وممكن تزيد شهر ولا شهرين كمان كل ده برده حسب نظام الحى او المجلس اللى انتا فيه فى بلدك وحسب موظفينه كمان متساهلين ولا معقدين وطبعا برده مسألة الرسم الهندسى للمصنع اللى بيتعمل فى المجلس المحلى برده والمعاينة اللى بتطلع معاك ويطلب منك حاجات داخل المصنع برده ده بيختلف من بلد لبلد وبرده تبع نظام المجلس اللى فيها ونظامه وحسب الموظف اللى هيعاين المكان ويرسملك رسم هندسى ويقلك عايز كذا هنا وعايز كذا هنا افتحلى منفذ تهوية او متفتحش كل شخص وليه نظامه وكل بلد وليها نظامها المهم :

طبعا انا مش متذكر اوراق الرخصة وإجرائتها بس اللى فاكره انك

خطوات الرخصة كالأتى

صورة عقد الإيجار _ صورة البطاقة الضريبية _ كشف ربط العوايد من الضرائب العقارية _ صورة البطاقة الشخصية _ رسم هندسى _ كشف تكاليف والجهات الحكومية اللتى هتروح لها علشان ترخص منها هى 1_ إدارة الاستثمار بالموافقة وقبول طلب الإقامة فى حالة ما اذا كان المكان المراد انشاء المشروع فيه داخل المجتمعات العمرانية

2_ إدارة التراخيص بالموافقة وقبول طلب الإقامة فى حالة ما إذا كان المكان المراد انشاء المشروع فيه داخل المدن او المحافظات

اما بالنسبة للأوراق المطلوبة انا مش متذكر ولكن انا هأنقل لكم كلام الأخ أكرم السابق تقريبا هو نقل كل شىء عن الترخيص وما يتعلق به بالنص



كلام الأخ : أكرم

أول حاجة بتعمل بطاقة ضريبية وسجل تجارى وخطواتها هى :

كيفية استخراج البطاقة الضريبية



المستندات المطلوبة لاستخراج البطاقة الضريبية :

1_ طلب استخراج البطاقة الضريبية ( لدى الوحدة )

2_صورة من عقد الإيجار أو التمليك مثبت به التاريخ أو موثق من الشهر العقاري

3_صورة البطاقة الشخصية /العائلية /الرقم القومي لصاحب المنشأة وللشركاء إن وجد

4_صورة من عقد الشركة إن وجد

5_صورة من إيصال تأمين عداد الكهرباء



على أن تقدم أصول جميع المستندات للإطلاع.

خطوات استصدار البطاقة الضريبية :

1_ يتقدم صاحب المنشأة بطلب الحصول على الخدمة إلى موظف الاستقبال ( الطلب موجود لدى موظف الاستقبال) وهو مجانى ثم ملء بياناته ثم يرفق بالطلب صورة ضوئية للمستندات المذكورة عاليه



2_يقوم موظف الاستقبال بتسجيل بيانات صاحب المنشأة وتوجيهه إلى مندوب مصلحة الضرائب داخل الوحدة



3_يقوم صاحب المنشأة بملء نموذج طلب إصدار البطاقة الضريبية ويرفق به المستندات المطلوبة



4_يقوم مندوب مصلحة الضرائب بمراجعة الطلب والمستندات ويحدد موعداً لتسليم صاحب المنشأة شهادة تفيد فتح الملف الضريبي للتعامل بها لحين إصدار البطاقة الضريبية



5 _ يتم فتح ملف ضريبى يعطى له رقم وهو ذات الرقم الذى يسجل على البطاقة الضريبية



6_يراجع صاحب المنشأة الوحدة خلال شهر لاستلام البطاقة الضريبية بعد إصدارها









كيفية استخراج السجل التجاري



المستندات المطلوبة لاستخراج السجل التجاري :

1_ طلب استخراج سجل تجارى ( لدى الوحدة )

2_صورة من عقد الإيجار أو التمليك مثبت التاريخ أو موثق من الشهر العقاري



3_صورة البطاقة الضريبية أو شهادة تفيد فتح ملف ضريبي



4_صورة البطاقة الشخصية /العائلية /الرقم القومي لصاحب المنشأة وللشركاء إن وجد



5_صورة من عقد الشركة إن وجد

6_شهادة المزاولة من الغرفة التجارية وهو ترخيص بمزاولة التجارة

على أن تقدم أصول جميع المستندات للإطلاع.

خطوات استصدار السجل التجاري :

1_ يتقدم صاحب المنشأة بطلب الحصول على الخدمة إلى موظف الاستقبال ( الطلب موجود لدى موظف الاستقبال)

2_يقوم موظف الاستقبال بتسجيل بيانات صاحب المنشأة وتوجيهه إلى مندوب مصلحة السجل التجاري داخل الوحدة



3_يقوم صاحب المنشأة بملء نموذج طلب إصدار السجل التجاري ويرفق به المستندات المطلوبة



4_يقوم مندوب مصلحة السجل التجاري بمراجعة الطلب والمستندات ويحدد موعداً لتسليم السجل التجاري لصاحب المنشأة



5_يتقدم صاحب المنشأة للوحدة بعد المدة التى حددها فى الخطوة السابقة لاستلام السجل التجارى



للحصول على ترخيص المصنع يستلزم الاتى:

1- الحصول على السجل التجارى

2- الحصول على صورة من عقد الإيجار أو التمليك مثبت التاريخ أو موثق من الشهر العقاري

3- الحصول على بطاقة ضريبية

ويتم تقديم طلب للحصول على الموافقة الى ادارة التراخيص وسيتم خلال 24 ساعة الحصول على الموافقة المبدئية وبعد فترة سيتم الحصول على الموافقة النهائية



المعدات المطلوبة فى مصنع الفنيك :



أولا : يا إما هنعمل خلاطة نضرب فيها كما ذكرتها قبل ذلك فى موضوعى السابق وكده كده إن شاء الله هتكلم عليها تانى بشىء من التفصيل مع رفع صور لها هنا

_ ويإما نضرب فى براميل لإنى لجأت إليها فى الأخر بعد أما الخلاطة الماتور بتاعها اتحرق وكانت عايزة شوية تظبيط من جوة .

يبقى المعدات المطلوبة هى :

1 _ براميل صاج مجلفن جيب اللى تقدر عليه البرميل بيسع 200 كيلو نقول مثلا 15 برميل مش هيخسر طبعا هما بيجوا مقفولين بالطبات بتاعتهم بنجبهم من اى بنزينة أو من بتوع غيار الزيت للعربيات وناخدهم نشطفهم كويس من جوة بماية سخنة او نملاهم ماية ونغليها على النار علشان تسيح المواد الى فيه ونسيبهم فى الشمس علشان لو كان فيهم حاجة من جوة غير الزيت تسيح وتنزل المهم نشطفهم كويس فى الأخر أى طريقة المهم ينظفوا من جوة وتكلفة البرميل انتا وشطارتك فى السعر سواء جبتهم من بتاع زيزت من بنزينة من اللى بيبع البراميل والجراكن فى بلدك عامة انا جبتهم ب 60 جنيه الواحد أهم شىء جبهم بطباتهم البرميل بيبفى مقفول وليه طبتين أو طبة علشان مش كل البراميل هنفتحها فى الشغل فيه هنفتحه خالص علشان هنضرب فيه زى اللى فى الصورة رقم (1) وفيه اللى هنسبه مقفول زى ما هو بطباته علشان هنجيب فيه خامات من شركة الكوك كما فى صورة رقم (2 ) ورقم ( 3 ) صورة رقم (1صور لبراميل معدنية سعة 120 لتر

2_ هنجيب حنفيات نظيفة بجلب نحاس نجيب مثلا 10 حنفيات بجلبهم النحاس طبعا جلب قلاووظ والحنفيات بتاعتها كذلك علشان يبقى سهل خلعهم وتركيبهم لو باظوا منك او لو احتاجت تغيرهم بعد كده وسعرالحنفية تقريبا 20 جنيه بالجلبه بتاعتها والحنفيات دية هنركبها فى البراميل اللى هنعبى منها ومش شرط نركب العشر حنفيات كلهم لإن ممكن نعبى من برملين ولا حاجة وبعدين اما يفضى البرملين نبقى ناخد بالجرادل من البراميل المليانة الأخرى اللى من غير حنفيات ونفضى فى البراميل اللى ركبنا فيها الحنفيات بص كل ده يرجع لنظامك فى شغلك والأسهل ليك دية مسائل مش محتاجة كلام المهم البراميل اللى هنركب فيها الحنفيات نلحم الجلب بتاعت الحنفيات الأول فى البراميل عند واحد بتاع لحام أوكسجين ونلحمهم كويس فى البراميل علشان اللحام ميفكش منك بعد كده لحام الجلب بس فى البراميل وبعدين بإدينا نبقى نركب الحنفيات

وفيه نقطة نخلى الحنفيات فى الجزء الأخير فى البرميل يعنى نسيب من الأرض حوالى 25 سنتى تقريبا وبعدين نلحم الجلب ونركب الحنفيات علشان الترسيب لإن بيبقى فى نهاية البرميل فنيك مرسب طبعا مش بنرميه ولكن بندخله فى شغل جديد بعد كده بس علشان نتفادى تعبئته وهو مرسب فى العبوات زى ما هو موضح فى الصورة

ودية صورة لحنفية متركبة فى برميل



3_ هنجيب بتاع 5 جرادل صاج علشان بنملى فيها الخامات ونوزع منها على البراميل الواحد منها بحوالى 10 جنيه

والجرادل الصاج بتبقى أفضل من الجرادل البلاستيك فى شغلنا لأنها بتعيش وبتستحمل ومتبوظش بسرعة

رقم المشاركة : [656 (permalink)]

ممدوح الجيار

عضو فعال جداً











4 _ هتعملك غلاية شاسية حديد محملة بثلاث عيون شعل كبيرة بماسورتين واخدة على انبوبتين اسطوانة كبيرة طبعا علشان الصغيرة غير مصرح بها او بماسورة واحدة بمشترك للأنبوبتين هى تقريبا كانت مكلفة 300 جنيه واسطوانة الأنبوبة كانت عاملة الواحدة 250 جنيه أهم حاجة الخراطيم بتاعتها تكون محملة كويس وتأمن عليها كويس





5_ هتعوذ حوالى 25 سبت مش هيخسر هتحتاجهم وقت ضغطة الشغل هما بيجابوا من عند الشريف للبلاستيك اسمها سبتة الزبادى علشان هنحط فيهم الأزايز بعد تعبئتها وسعر السبت كان 14 جنية

6_ هتشترى طرمبتين للبراميل بتاعة أحماض وزيوت علشان تبقى أسهل ليك لما تجى تاخد من البراميل المقفولة اللى هنجيب فيها خامات سواء من الكوك زى زيت الكلوزيت مثلا طبعا البرميل بيبقى مقفول وفيه طبتين الماكينة الطرمبة هتركب مكان طبة البرميل وتضخ منها زيت الكلوزيت أو الزيت المحمض زى ما هنتكلم بعد كده على الخامات وأماكن شرائها المهم الطرمبتين أسهلك فى تفريغ محتويات البرميل بدل اما تقعد تميل البرميل وهو بيبقى تقيل وينكب منك على الأرض فالطرمبتين أسهلك

والطرمبة عاملة 150 جنية وممكن تشترى واحدة وتبقى تنقلها من برميل لبرميل لو عاوز توفر ودية صورة ليها هى طبعا مش راكبة فى البرميل فى الصورة اللى راكب فى البرميل جزء منها هى بتبقى عبارة عن دراع زى ماكينة الخياطة وتقعد تلفه بإيدك يقوم يضخ محتوى البرميل للخارج بدل اما تميل البرميل المهم تكون الطرمبتين اللى هتشتريهم بتوع أحماض وزيوت

7 _ هتجبلك مطرقة حوالى 15 كيلو ولا حاجة حديد يإما تجبها ألمانى يا إما صينى يا إما مصرى المهم تعيش معاك وبعدين نركب لها يد شوم طويلة علشان هنستخدمها فى الدق على برميل فيه مادة جامدة اسمها رجينة بالبلدى وباسم بلدها اللى بتيجى منه اللى هى الصين ألفونيا صينى ww المهم كل ده هنبقى نتكلم عليه والمطرقة المصرى عاملة 60 جنيه باليد الشوم تبقى 70 جنيه اللى هى بنقول عليها مرزبة ودية صورة ليها طبعا هى مشو واضحة هنا غير اليد بتاعتها بس هى اللى باينة فى الصورة اللى عليها سهم باللون الأحمر بس هى زى المرزبة الصغيرة دية بس على كبير اللى مشاور برده عليها بسهم لونه أحمر كما فى الصورة :

8 _ برده هتحتاجلك كوريك هو ملوش صورة هنا بس الكوريك هقولك شوفت الناس اللى بيشتغلو فى المعمار العمال اللى بيبقى معاها زى جاروف كبير صاج وليه يد طويلة خشب بيشيلو بيه المونة ويحطوها فى القصعة هو ده بقى الكوريك طبعا هنحتاجه أيضا فى تنعيم الألفونيا بعد تكسيرها ونشيلها بيه وهو عامل 15 جنية هاتلك اتنين ولا حاجة



9_ هتحتاجلك حوالى دستين جونتيات أحماض وانا بقول دستين لأنك هتجرب بنفسك الجونتى مبيكملش شهر إلا إذا كنت جايب جونتيات من الغالية الألمانى لإن اللى فى السوق كله مصرى وصينى وطبعا الجونتيات بتشتريهم من أى شركة مواد إطفاء ومستلزمات الأمن الصناعى الدستة ب ....... انا مش متذكر سعرها الأن

طيب واحد ممكن يسألنى ممكن نضرب الفنيك من غير ما نلبس جوانتى أقولك ممكن فى مواد من التركيبة ومواد تانية لازم هتلبسلها جونتى زى الفينول كريستال ، الصودا

وعامة برده لسخونة البراميل اللى هتضرب فيها لما تشغل عليها النار وسخونة جردل الصاج فى ايدك وانتا بتتنقل على البراميل اثناء التضريبة هيخليك تلبس الجونتى المهم اهم حاجة لما تشتريه يكون جونتى احماض علشان يستحمل السخونية فى ايدك وفيه منه أنواع كما ذكرنا فيه الغالى وفيه الرخيص

نصيحة منى خليك مع النظيف الغالى يعيش معاك





10 _ لو عايز تجيب وده مش شرط لإن العملية مش معضلة فلو حبيت تشتريلك أفرول تشتغل بيه ماشى خير وبركة ولو حبيت تشتغل فى لبس قديم من عندك اى لبس ماشى علشان متكلفش نفسك

_ وبرده لو حبيت وده برده مش شرط تشتريلك حذاء بوط زى اللى هبقى أورهولك فى الصورة خير وبركة ولو هتشتغل فى جزمة اى جزمة عادية ماشى

لإن العملية مش معضلة زى ما قلتلك ما انتش شغال قدام خلاطات 10 طن ده انتا بتضرب فى براميل ده حتى الخلاطة ال4 طن ودية انا كنت شغال عليها وكنت شغال بلبسى العادى لبس خروج اتوسخ بس وعامة بيطلع مع المساحيق يعنى لو اتعصت من صابونة الفنيك عاديها دلوقتى وبعدين نبقى نشرحها لو اتعصت منها عادى مع المساحيق بتطلع ( خطورة الفنيك أثناء التفاعل بس فى الأول ومش معضل برده طالما انتا مش شغال قدام خلاطات كبيرة 10 طن ولا حاجة زى مصنع فنيك العاشر طيب ده انا كنت واقف فوق الخلاطة ال 4 طن اللى عندنا فوقيها زى ما هبقى اوريلك صورها وشغال فى عز المعمعة زى ما بيقولوا والدخنة طالعة شديدة اثناء التفاعل لإن التفاعل بيطرد الحرارة فى صورة دخان شديد وده طبعا علشان 4 طن وخلاطة فبيحتاج حوالى شكارتين صودا والصودا فيها حرارة فأثناء التفاعل كانت الحرارة طالعة شديدة من الخلاطة وانا فوق الخلاطة وواخد الدخنة معظمها طالعة علية وعادى يعنى وكلمت شغلى على هذا الحال وطبعا مش بقولك اعمل زى لأ اعمل انتا الصح ولو عندك خلاطة لا تقف فوقيها خليك فى الأمان اقف على السلم الثابت للخلاطة لأحسن تتزحلق وتقع فى الخلاطة وتجيب الغلط عليه وانا عايز منك دعوة حلوة مش دعوة تبهدلنى

وطبعا الغلط كان منى مش الغلط انى اقف فوق الخلاطة لإنى انا واخد على كده اما انتا بلاش تقلدنى قلد الصح لأ أقصد ان الغلط كان انى اثناء وضع الصودا فى الخلاطة طبعا بعد ذوبانها فى برميلين ماية البرميل ال120 كيلو البلاستيك المفروض انى بحط الصودا سرسوب سرسوب فى الخلاطة علشان التفاعل يتم بشكل سليم لحد اما يتم التفاعل ابقى افضيها خالص الصودا يعنى علشان ميحصلش فوران فى الخلاطة يؤدى إلى ان الصابونة تنكب من الخلاطة تبهدلنا وهى سخنة ملهلبة او تحصل نتايج متضاعفة اكتر من انها تنكب كان الغلط منى طبعا انا كنت بحطها سرسوب سرسوب طبعا بس خانى التفاعل وفكرت ان التفاعل تم فبقيت احط بالجردل على طول ورا بعضه فالحرارة بقت شديدة تانى والدخنة كترت اوى دليل ان التفاعل لسه ما كنشى طرد الحرارة علشان يتم

لكن لما تضرب فى البرميل الأمر بيبقى سهل بس طبعا برده اثناء وضع الصودا فى البرميل علشان التفاعل برده بيبقى وضع الصودا سرسوب سرسوب لحد اما الحرارة تهدى ويتم التفاعل احط باقى الصودا بس هنا متبقاش الحرارة اللى طالعة على هيئة دخنة شديدة فى برميل 200 كيلو زى خلاطة 4 طن بتيقى الدخنة مش شديدة والعملية دية ترجع لظبط التفاعل بتاعك وظبط ايدك وانتا بتحط الصودا فى البرميل يكون سرسوب سرسوب زى ما قلنا حقن يعنى تحقن بالصودا

المهم نرجع لموضوعنا هتشترى حذاء بوط بتاع أمن صناعى ماشى وهتشترى أفرول ماشى هتلبس جزمة من عندك عادية ولبس قديم من عندك ماشى

المهم فى كل دول الجوانتى هو اساس الشغل علشان زى ما قلت التعامل مع الفينول كريستال والصودا

او السخونية بصفة عامة لحد اما تبرد صابونة الفنيك اللى هو المرحلة الأولى فى تصنيع الفنيك

والصورة للحذاء البوط أهى وعلى فكرة انا ملبستوش غير 3 مرات فى 3 تضريبات بس وبعدين زهقت منه رميته هو يمكن ينفعك لما تعملك خلاطة 4 طن ولا حاجة وعامة لو بتحب تشتغل على نزاهة ونظافة هاتلك واحد مش هيخسر لإنه مش غالى



11_ هتجبلك شوية خراطيم بلاستيك على مقاس الحنفية نصف بوصة علشان هنحتاج ماية وهنحتاج ننقل الخرطوم من برميل لبرميل والأفضل أنه يكون فيه كذا حنفية ماية 2 أو 3 متركب في كل واحدة خرطوم علشان تنجز معاك المهم جبلك على الأقل لفة خرطوم بتاع 40 متر وابقا اقطع منها على قد احتياجك بس اهم حاجة هاتلك خراطيم نظيفة تستحمل معاك ومتتهريش منك بسرعة او تنخرم

طبعا فيه خراطيم فى هذا المصنع كتير بس هى مش واضح منها فى الصورة غير واحد

12 _ هتشتريلك ميزانة طبلية أو بيسموها حصيرة هتجيب المتوسطة اللى بتقيس لحد 100 كيلو كفاية ومعقولة هتلاقى فيه منها مستعمل وفيه جديد المستعمل عامل 500 جنية والجديد 800 جنيه ده سعرها من 6 شهور كنت سائل عليها لإنى كنت ببيع اللى عندى المهكعة علشان أشترى جديد.





13 _ هتشتريلك قماع صاج ( قمع يعنى ) من الكبير ده يملى معاك الجمدانات بسرعة وبيستحمل اشتريلك 3 ولا حاجة وابقى ركبلهم حتة خرطومة فى بوزة كل واحد علشان يعبى بسرعة فى الجمدانة وميعملش رغاوى لإن الفنيك بيعمل رغاوى عند تعبئته والجمدانة زى ما هاوريلك فى الصورة بتبقى طويلة عن الجركن ال 20 كيلو فلو حطيت القمع على بوز الجمدانة من غير ما تركبله حتة خرطومة طويلة هتلقيه بيعمل رغاوى للفنيك اما لما تركب الخرطومة فى القمع هتقرب من قاع الجمدانة تقوم مطلعش رغاوى إلا بسيط والقمع الصاج الكبير عامل الواحد 5 جنيه وجبلك برده قمعين صاج ولا 3 من الصغيرين والوسط للجراكن وابقى برده ركبلهم حتة خرطومة فى كل واحد والقمع الصغير عامل 2 جنية والوسط 3 جنية

وطبعا القماع الصاج اللى اقصدها زى اللى بيتعبا بيها الجاز فى الجراكن شوف بتستحمل ازاى وعملية مع بتوع الجاز احنا بقى عايزينها تعيش معانا برده بس فى الفنيك بدل اما تجيب بلاستك ويبوظ منك بسرعة .







14 _ هتشتريلك 25 جمدانة ولا حاجة وطبعا فيه منها مستعمل وفيه جديد المستعمل ب 19 جنية والجديد ب 23 جنية وفيه سكك أرخص من كده وسواء جبت مستعمل ولا جديد مش فارقة كده كده هتتوسخ من الفنيك وانتا كده كده مش بتبعها للعميل ده انتا بتاخد مكانها واحدة تانية فاضية او بتسبها عنده وتاخدها المرة الجاية بس الأحسن انك تاخد مكانها علشان مش كل شوية تشتريلك جمدانات وتتعطل لحد اما تجيلك تانى اتعود تاخد مكانها واحدة فاضية بتاعة كلور بتاعة سلفونيك اى جمدانة كده كده انتها هتغسلها تانى قبل اما تعبى فيها .

15_ هتعملك حتين خشب ( عصايتان شوم خشب ) زى المقداف مشطوفة من تحت محملة علشان هنقلب فيها فى البراميل الواحدة ب8 جنية ولو عايز تبتكر أحسن ماشى انا شوفت فى مصنع من المصانع عامل يد شوم طوية خشب وعلملها معلقة من تحت من الخشب معلقة مسطحة زى معلقة الأكل بالظبط جميلة وعجبتنى فكرتها جدا بس لما سألته قالى دية تعدى ال 30 _ 50 جنية عاملها اما اللى انا بقولك عليها يد شوم خشب طويلة ومشطوفة من تحت عادية حبيت تعمل التانية هتقلب بيها كأنك بتقلب بمعلفة أكل كبيرة

16 _ هتجبلك برميلين بلاستيك الى بيسع 60 لتر علشان هنعوذهم ندوب فيهم الصودا والواحد عامل 20 جنيه

وهى المشار عليها فى الصورة بالسهم اللى لونه أصفر: وهى مش واضحة قوى فى الصورة وهى البرميل البلاستيك اللى باللون الأزرق الصغير ال 60 لتر سعة



17 _ طبعا لما نيجى نعبى الفنيك السوبر فى ازايز السوبر قدامك ماكنتين تشتغل عليهم علشان تقفل غطاء ازازة السوبر زى تقفيل العاشر الغطاء المعدنى الذهبى مقاس 28 يا إما نقفل بماكينة يدوى او نقفله بماكينه اتوماتيك هنتكلم على الأتوماتيك الأول : هى ماكينة لها ماتورين وتعمل اوتوماتيكيا لتقفيل الغطاء على رقبة الإزازة حيث انها بتقلوظ الغطاء على رقبة الإزازة القلاووظ وتقفل دبلة الغطاء على حافة الإزازة حنى تكون محكمة مثل غطاء ازازة اى علبة دواء

وطبعا انا مش هتكلم عليها كتير لإنك لو عملتها هى بتتعمل عمولة كده كده لازم المهندس اللى هيعملهالك هيدربك عليها فهتكون فى غنى عن شرحى لإنها عايزة شرح عملى وليس نظرى وهى بتتعمل فى القاهرة _ العتبة _ الجامع الأحمر _ 18 درب عبد الخالق ده المعرض والمصنع نجيب الريحانى _ 14 عطفة البركة

اسمها ورشة الإتحاد الصناعى للصناعات الدقيقة _ محمد يحيى الخراط _ محمد حسن _ محسن _ الحاج حسن

التليفونات : 0225882916 _ 025903710

وهى كانت متكلفة 3800 جنية من سنة



وفيه الماكينة اليدوى : عبارة عن ماكنتين واحدة تقلوظ الغطاء والثانية تقفل دبلة الغطاء على الإزازة بس عيبها انها بطيئة شوية وعايزة ايديك تكون سريعة عليها علشان تنجز وفى نفس الوقت ايدك تكون حساسة عليها علشان متدبحش الغطاء من الجناب ( يعنى عايزة تعود شوية )

بس جميلة انا اشتغلت عليها فى الأول اول ما فتحت وقعدت سنتين اشتغل عليها ومدبحتش معاية غطيان لإن ايدى خدت عليها وكنت شغال سريع جدا عليها هى مسألة تعود بس بعد اما جبت الأتوماتيك حسيت بإنجاز رهيب فى الوقت وراحة لإيدى

وهى بتتعمل برده عمولة عند الورشة السابق ذكرها فى الكلام على الماكينة الأتوماتيك

وهما ماكنتين بيتعملوا مع بعض واحدة بتقلوظ الغطاء والتانية بتكبس الغطاء

وكانوا متكلفين الأتنين 450 جنية

http://www.arab-eng.org/vb/t5844-68.html

18_ هتشتريلك ماكينة لاصق الكراتين علشان تلصق بيها الكراتين معروفة طبعا اللى بيوضع فيها بكرة اللاصق وتشد الللاصق على الكرتونة وهى بتتباع فى آى مكتبة كتب او خردوات ب 27 جنية



---------------------- هنتكلم دلوقتى على الغطيان والإزاز -------------------------------------

أولا : الغطيان 1 _ غطاء ازازة السوبر وهو الغطاء المعدنى الذهبى مقاس 28 اللى هنغطى بيه الإزازة السوبر وهنستخدم فى تغطيته لإزازة السوبر الماكينة الأتوماتيك أو اليدوى اللى ذكرناها قبل ذلك وطريقة التغطية سواء باليدوى او السوبر المهندسين اللى فى الورشة الصناعية اللى ذكرتها لك قبل كده هيعرفوك بالتفصيل كيفية استخدام الماكينة اليدوى او الأتوماتيك وكل شىء عنها بالتفصيل لإن ذلك يحتاج إلى العملى وليس النظرى فاتصل بيهم واتفق معاهم واذهب اليهم وشوف بنفسك الطريقة العملية لتغطية الإزازة السوبر بالغطاء المعدن الذهبى مقاس 28

وهذا الغطاء بيركب على ازازة السوبر الكبيرة سعة النصف لتر وبيركب على الإزازة السوبر الصغيرة سعة الربع لتر وهو بيتباع بالكرتونة كرتونته فيها 4500 غطاء ب 390 جنية

وأماكن وجوده فى كذا محل هأذكر منها على سبيل الإجمال وليس حصر كل اللى بيبعوا الغطاء ده لأنك هتلاقى كتير فى المكان اللى هأقولك عليه محلات كتير

المهم اللى معاية عنوانه منهم دلوقتى وتليفونه هو :

محلات أولاد نصر سالم لتصنيع البلاستيك وجميع أنواع العبوات البلاستيكية _ الحاج : عيد ورشاد نصر سالم _ العنوان : القاهرة _ العتبة _ كلوت بك _ 22 ش الجامع الأحمر _ 0101310224 _ 0123341828 _ 5930029 _ 5886844

------------------------------------------------------------------------------------------------

وعامة كل شارع الجامع الأحمر الأغلبية فيه بتوع غطيان وانا ذكرت المحل السابق لإنى مش معاية كروت للمحلات التانية لإنى مش محتاج كروت انا بنزل الف على كل المحلات اللى هناك لإنى كده كده بنزل اتابع الأسعار بنفسى اهم حاجة تاخد معاك ازازة سوبر كبير وازازة سوبر صغير علشان تشوف الغطاء بيركب عليها ولا لأ وتتأكد إنه مش واسع على الإزازة وإنه مقاسها بالضبط واهم حاجة تتأكد انه مقاس 28 لإن هو ده المقاس اللى بيجى على قد الإزازة بالضبط

---------------------------------------------------------------------------------------------

وفيه مصنع للغطاء ده بس طبعا والله أعلم ممكن ميطلعش غير كميات كبيرة على العموم جرب انا لم اتصل به وه :

نور _ الوكيل الوحيد _ شركة جلاس كاب _ العاشر من رمضان _ 015387072 _ 015387073

http://www.arab-eng.org/vb/t5844-68.html

2 _ غطاء ازازة الشعبى وهو الغطاء البلاستيك الأصفر اللى عليه من فوق علامة 11 اللى هنغطى بيه ازازة الشعبى وده بيدخل فى الإزازة ضغط عادى بالإيد

وهذا الغطاء بيركب على ازازة الشعبى الكبيرة سعة النصف لتر وبيركب على الإزازة الشعبى الصغيرة سعة التلت لتر وهو بيتباع بالألف سايب الألف ب 38 جنيه

وأماكن وجوده فى كذا محل هأذكر منها على سبيل الإجمال وليس حصر كل اللى بيبعوا الغطاء ده لأنك هتلاقى كتير فى المكان اللى هأقولك عليه محلات كتير

المهم اللى معاية عنوانه منهم دلوقتى وتليفونه هو :

محلات أولاد نصر سالم لتصنيع البلاستيك وجميع أنواع العبوات البلاستيكية _ الحاج : عيد ورشاد نصر سالم _ العنوان : القاهرة _ العتبة _ كلوت بك _ 22 ش الجامع الأحمر _ 0101310224 _ 0123341828 _ 5930029 _ 5886844

---------------------------------------------------------------------------------------

وعامة كل شارع الجامع الأحمر الأغلبية فيه بتوع غطيان وانا ذكرت المحل السابق لإنى مش معاية كروت للمحلات التانية لإنى مش محتاج كروت انا بنزل الف على كل المحلات اللى هناك لإنى كده كده بنزل اتابع الأسعار بنفسى اهم حاجة تاخد معاك ازازة شعبى كبير وازازة شعبى صغير علشان تشوف الغطاء بيركب عليها ولا لأ وتتأكد إنه مش واسع على الإزازة وإنه مقاسها بالضبط واهم حاجة تتأكد انه مش بيفلق من الجناب لما تضغطه فى الإزازة لإن فيه نوعية منه بتفلق بسرعة او مخرمة جامد من الجنب تقوم تسرب الفنيك من الإزازة وبيهدلك الكرتونة يعنى بإختصار كده ابقى جرب تحط فى الإزازة وانتا بتشترى ماية وبعدين غطى بالغطاء واقلب الإزازة وشوف بتكب ولا لأ وهو معروف باسم الغطاء البلاستيك الأصفر ال 11

موضوع منقول من منتدى ملتقى المهندسين



No comments: